Die Brotvermehrung

139. Wia da Jesus sei' erst's Wunder vollbracht hod

Eines Tages war’n da Jesus und seine Jünger zu ana Hochzeit beim Bergbräu in Kana eigladen, a kloane Ortschaft in de‘ Berg‘ vo Galiläa. Es is recht lustig zuaganga, d’Braut hobn’s in’n Weinkeller verzogn ghabt und der Hochzeitslader hod an Bräutigam grad recht derbleckt, wia’s in der Küch‘ auf oamoi a Hektik geb’n hod. „So was Blöd’s aber aa“, hobn d’Bedienungen an Wirt opulvert, „hast wieder ned rechtzeitig beim Vertreter bstellt, jetzt is uns der Wein ausganga!“

D’Maria, am Jesus sei‘ Muatter, war aa dabei und hod an Jesus gebeten: „Jesus, bitte dua was, wenn ma ned irgendwo an Wein herkriagn, nacha platzt die ganze Feier. Des waar a Schand‘ fürn Bräutigam und sei ganze Familie.“ Da Jesus hod bloß ganz cool erwidert: „Was tuast di‘ denn so ab, des geht doch di‘ und mi‘ gar nix o. Mei‘ Stund is no ned da.“

D’Maria aber hod zu de‘ Bedienungen und de‘ Wirtsleut‘ gsagt: „Deads alles, was er euch oschafft.“ Sie hod nämlich scho gwußt, daß da Jesus die Brautleut‘ ned im Stich lassen und sie vor derer Schand‘ bewahr’n daad.

Bei de‘ Juden war’s der Brauch, beziehungsweis‘ a religiöse Vorschrift, daß sie sich aa während’m Essen d’Händ‘ oiwei wieder gwaschen ham. Wia da Jesus gsehgn hod, daß die hohen Wasserkrüag, in dene as Wasser für die Gäste bereitghalten wordn is, leer warn, hod er zu de‘ Bedienungen gsagt: „Füllts die Krüag wieder mit Wasser auf, und dann bringt’s am Schankmoaster an Schoppn zum Probiern."

„Saxendi, is des a guats Tröpferl“, hod der ganz erstaunt zum Bräutigam gsagt und sich as Mäu abgschleckt. „Normalerweis serviert ma‘ den guaten Wein glei‘ am Anfang, aber du hast as um’kehrt gmacht und den besten bis zum Schluß aufghobn. Respekt!“ hod er gmoant und sei Glasl austrunka. Er hod ja ned gwusst, woher der guate Wein kemma is.

Des war des erste Wunder, des da Jesus vollbracht hod. Dadurch hod er sei Herrlichkeit offenbart, und seine Jünger hobn an eahm ‘glaubt.
Johannes 2

Noch mehr Geschichten finden Sie im Bayerische-Bibel-Blog